SOSĖPAŽINKEM SO KAPSŪDĒS (Odė Kapsūdžiams)
/ 0
- Informacija
- Parašė Stefanija Petreikienė
- Skaitytojų: 2656
Nu Plungės žėida
Link Žarienu posės
Naprivažiavus Žlėbėnū
Šeštam kiluometrė yr īsėkūrės
Namažus tuoks kaimielis Kapsūdžiū.
Kaims vakarūs prasėded nu Sungailu.
Rytėnė posė baigās tėis Šarkēs Daukīntė keimė.
Pėitėnem taškė yr Latāka Pranė ūkis,
Vu šiaurie – Peldžius so dukruos šeima yr īsėkūrės.
Kaims mūsa – vėinė kalnā ė pakalnės,
Ė kēls – kāp kėrmėns susiraitės.
Gyven če – vėsė žemaitelē
I myl ba pruota sāva žemė.
Na vėinuo trobuo jau pasēna žmuonys,
Ė lėgas anus pol kāp kuoki karuonė.
Bet... Dievū apvaizda anūm naaplēda
Ė artėmėje so anās apsėgyvēna.
Vu kon apei senuolius mūsa bašnekietė!
Račkauskis, Garbenčienė, Peldžius, Juonošienė –
Šėi žmuonys mūsa kaimė yr seniausė
Ė dėl tuo – patys garbingiausė.
Vyroka mūsa – Sauseris, Vaseris, Rosys ė Jėnkauskis
Nikāp nanuor dar senās pasėjaustė.
Darboujas, ploš, kėik anūm jiegas lēd,
Ė žemės ūkė vādžiū nikāp napalēd.
Če kaime retā pamatysi žmuogu gėrta,
Nikam narasi lauka naapdėrbta.
Keliu važioujint matā kalvuota lauka plāti,
Vu balta šėina rolē džiogėn tāva aki.
Kėik teka mo n girdietė iš kėtum,
Ka Kapsūdžiūs yr pagrindėnės šaknys Latakūm.
Iš anūm – puora ūkėninku yr truopniūm.
Ba katrūm traktuoriu, kombainu,
Pražūtės būtu na vėinām če kaime.
Iš anūm – vėins yr mėlžėns Rimvydoks –
Pačiuo jėguo nepaprastā stėprus vyroks.
Nablogā būtu siūstė anon pas Žydrūna,
Ka Vėlniou jiegas išmėgīntu so galiūnās.
Gyvēn če centrė Bladžienelė –
Protīnga, gera motrėškelė.
Pas katron galiu aš užbiegtė
Ė rimtā, gražē pašnekietė.
Ėlgus metus kaimīnās bova ė Arlauskē,
Katrėi senuokā jau link miesta pasėtraukė.
Bet... nuors gyvēn anėj galė Glaudžiū,
Bet šėrdės, kāp ka sāka, pasėlėka Kapsūdžiūs.
Vo pri pat kēlė jau nu sēna
Stonkū Liuselė če gyvēna.
Bet lėgas anon ka pradiejė griaužtė –
Liuselė išsėkielė pas bruoli ī Kontaučius.
Gyven če Raimunds su Iluona –
Savuotėška īduomi anūm puora.
Šep veiz ī darba gana tingē,
Bet kaimė yr pėrmėjē talkininka.
Kāp liūdna kaimė būtu če ba Elenytės,
Katra spie vėsos aplonkytė.
Rēk su anu pralestė nuors adyna –
Ė jau žėnā vėsas kaima naujynas.
Vo jē jums rektom darbėnīnka –
Mes torem Sauliu talkėnīnka.
Nabėjė vaikis tas jokiūm darbūm.
Vu žėna anon – nu Kontaučiu iki pat Glaudžiūm.
Gyvēn če Rimkā ė Petreikē.
Abėdvė šeimas – daugiavaikės.
Šėi žmuonis šep jau gana taikė
Ė mēna krypti vės palaika.
Tik anyms nerūp gyvulelē,
Nes vėsė yr medė meistrelē.
Mes torem ė naujakoriūm –
Jaunūm, protīngu ė darbščiūm žmoniūm,
Katrėi sodybu gruožiou skėr nemaža laika,
Tou pačiu gražėn kaima veida.
Tik nasopykėt tėi, katrūm napaminėjau,
Žinuokėt – kėtēp nagaliejau.
Nes jēgu nuori apei žmuogu ko rašytė,
Rēk anon biškilieli artėmiau pažīntė.
Ka dėina dėdėlē jums napraėlgtu –
Galiu pasiūlytė savuotėškā istuorėniu aš vėitu.
Če pradžiuo kaima dešiniuojuo posie atokiau nu kelė
Stuov liūdna vėinėša Gaubiū truobelė.
Bet žlėbėnėške vės dar naprarond vėltėis
Ka vakā ī senatvė kumet nuors gal dar susėproties.
Torem mes Sāldžioji Gėrelė,
Katra žaliou če pri pat kelė.
Legenda iš praeita omžiaus sklonda tuoki mondri,
Ka vyrā meilė kažkumet če siemė somtēs.
Ī ontra kelė posė jē pasoksi –
Istuorini pasėkavuojusi tarp kalu prūda rasi.
Gyvybė sāva jēm uns iš šaltėniu,
Dėl tuo ė gražiu vardu uns „Amerika“ vadėnas.
Mes torem tēp vadėnama Petreikė kālna,
So katrou šiuoperē sotartė banda.
Jē tik erieli katras nuors če banda pavaizdoutė,
Tam tujau tenk ī griuovi nuvairoutė.
Vu ontram kaima galė – jau pri ketorbotė
Mes torem tep vadėnama visdoka.
Jē to tik vaira per mažā pasoksi –
Atsargus būk, nes tujau spronda nusėsoksi.
Vu kas dėl kaima perspektyvas,
Manau, bus nuomonė vėsūm vėinīnga.
Če cėntrė toront tuoki darbšti gondrūm šeima
Dėl kaima išnykėma nier juokiuos mums baimės.
Vėsīms šiuo kaima gerbiamims senuolems
Stėpriuos svekatas palinkietė nuoru.
Ka vuobelys daug metu po longās žydietu,
Vo akies – džiaugsma kėbėrkštelės ka žėbietu.
Vėsīms če susirīnkusims noriečiau palinkietė
Džiaugsminga, gēra nuotaika torietė.
Susėpažīntė, pasėrokoutė
Sotėkus jau senē pažistamus.
Ė džiaugtėis kāp ė tīms gondrams,
Ī sāva gimta kaima viel sogrīžus...
2014